沪语悦读草婴先生的书房
发布日期:2020-08-01 01:21   来源:未知   阅读:

  草婴先生个学识搭人品,我是老早就仰慕个,可惜个是伊勿勒海屋里。因为年纪大,身体比较推板,草婴先生己经勒华东医院里静养好几年了。每日天下半天三点钟左右,夫人盛天民老师侪要到医院里去一趟个。搿是盛老师一日天当中顶顶重要个活动内容。

  草婴先生个书房勿算大,朝南,勒西面搭北面个墙壁搿搭,有得三只老式个带玻璃门个大书橱,里向装满了各种精装封面个俄文版书。南墙搭仔北墙空档个地方,挂勒海伊拉个囡儿盛姗姗画个一幅中国画。盛姗姗是画家搭美术编辑,当年要以艺术家个身份到美国去求学,勒办签证个辰光,签证官要求伊当场泼墨作画,以此来证实伊个真假高低,搿能介,就有了迭幅水墨丹青。

  勒书房东南角个南窗下头,有只邪气简单个老式写字台。草婴先生几百万字个翻译作品,就侪勒迭只老老普通个写字台浪向完成个。南窗个外头是只小阳台,阳台个伊扇门搭进来辰光个北门正好是直线相对。小阳台浪,是几盆相当随意个盆栽植物,长得倒是蛮郁郁葱葱个。

  东面墙壁个壁炉上头,是草婴先生个一张大照片。壁炉个小小台面浪,有得四盆花摆勒海,台面右边,是一尊草婴先生个雕塑头像。写字台个右侧,南窗搭仔门当中个墙壁浪,上下挂勒两张小照片,一张是草婴先生个半身像,面带慈祥笑容,身后是雕塑感老强个巴洛克风格拱型门框。下头一张照片,是伊拉夫妻两家头勒书房里向个合影。南墙个上头,是一张老老大个、黑白个老式照片。照片里向,年轻辰光个盛天民邪气开心个对牢仔阿拉。

  书房勿单单是草婴先生写作个地方、也是伊会客个场所。联想到《战争与和平》《安娜·卡列尼娜》《复活》迭些大部头著作个翻译稿个完成,侪是从搿搭走向人间个,我拨深深个震撼!我好像看到了草婴先生每趟勒翻译工作完成之后个仰天一笑个神情,也好像看到了读书人捧牢仔书,邪气认真个勒勒读个辰光个神态。

  我立勒草婴先生个写字台前头,看牢仔有得昨日意象个大花园,勒勒想像草婴先生漫漫个译笔……

感谢阅读,欢迎再来!